பத்திரப்படுத்தி வை...

இப்போதே பத்திரப்படுத்தி வை...
என் முகம் பதிந்த
ஏதேனும் ஒரு புகைப்படத்தை...

என் முகமோ முகவரியோ...
நீ முதலில் மறக்கப்போவது
எதுவென்று தெரியவில்லை...

சிரித்துப் பேசிய நாட்களை
நினைத்துப் பார்க்கவும்
நேரமிருக்குமோ தெரியவில்லை...

பழைய கவிதைகளோ...
பகிர்ந்துகொண்ட கதைகளோ...
பார்த்து பேசிய இடங்களோ...

ஏதேனும் ஒன்று
என்றாவது ஒருநாள்
என்னை நினைவுபடுத்தக் கூடும்...

என் கல்யாண செய்தியோ...
கருமாதி செய்தியோ...
என்றாவது ஒருநாள்
உன் வாசல் வரக்கூடும்...

அப்போது தூசு தட்டி பார்க்க
ஒரு புகைப்படம் தேவைப்படும்...

இப்போதே பத்திரப்படுத்தி வை...
என் முகம் பதிந்த
ஒரு புகைப்படத்தை...